--------------------
زبانحال حضرت فاطمه زهرا (س) ۳۹۹۴
متن نوحه —-> زبانحال حضرت فاطمه زهرا (س) ۳۹۹۴
زبانحال حضرت فاطمه زهرا (سلام الله)
عم اوغلی حقون حلال ایله سندن آیریلورام
حسین قالور آناسیز هم حسندن آیریلورام
چتندی آیریلق ای لنگر زمین و زمان
بو آیریلقدا منه سن حمایت ایت الان
باخوم جمالوه جانانه ویروم آسان
کم ایتمه لطفوی بیرلحظه مندن آیریلورام
یاشاماسین گوروم عالمده ظالم و خونخوار
او کسکه ظلمین اساسین قوروبدی اولسون خوار
نجه دیوم سنه بو سینمی دلوب مسمار
کنار اولور داخی روحیم بدندن آیریلورام
منم او فاطمه شأنمده آیه نازلدور
منه اذیّت ایدن اهل شرک و باطلدور
اوثانی هم منه هم محسنیمه قاتلدور
خدایه شاکیم اول قان توکندن آیریلورام
منافق امّت الیندن بیلیم بوکولدی منیم
تک اگلشوب ایویمده امام ممتحنیم
غریبم اوز وطنمده هانی گلوب گیدنیم
ئوزوم قوتولدی بو اهل وطندن آیریلورام
زمانه قویمادی بیر لحظه دنجله زهرا
آلوب بالالارین آغوشه بیر گُله زهرا
اوزون یتور او قدر قالمادی ئوله زهرا
بو چرخ بد روش و پر فتندن آیریلورام
وصیّتیم بودور ای شهریار نیک مآب
ایلیکه ایتدی غروب آفتاب عالمتاب
گجه زمانی منه غسل ویر سن ایله ثواب
نهان مزاریمی ایت مرد و زندن آیریلورام
باتاندا گون اوزیوی تز یتور ایوه آخشام
حسینم آغلاسا من قبریده ملول اولام
دینده وای آنا زینبیم ایله آرام
سنون امیدیوه بو انجمندن آیریلورام
جهاندا قالسا آناسیز اوشاق صولور سارالور
خصوص قز اوشاقی فکر ایله نه حاله قالور
باخاندا زینبمه صبر و طاقتیم آزالور
ایله دیور من او شیرین سخندن آیریلورام
عم اوغلی آغلاما آغلار گوزیوه من قربان
سن آغلاسان بالالار آغلاشار همین الان
باشیمون اوسته اوتور صبرایله اوخی قرآن
فدا بو لحنیوه بیت الحزندن آیریلورام
جهاندا فاطمه نون مثلی اولماز «عینی فرد»
ولی آز عمریله چکدی مین ایلجه غصه و درد
باخاردی حسرتیلن مرتضایه چهره سی زرد
دیردی حیف اولا خیبرشکندن آیریلورام
شاعر : استاد غلامرضا عینی فرد زنجانی
!!! لطفا با نام…
👉 https://sarmashg.ir/mag/?p=21781 🌐
————————
#⃣ #متن_نوحه
🔘 🔗 دیدن متن کامل
- ۹۸/۰۶/۰۷